Item, fo balotà ducati 200 per dar a l'orator di Franza, va in campo, per le spexe di uno mexe, e li danari per li cavali è a Padoa.
     
      Da Gradisca, di sier Andrea Zanchani provedador zeneral, di 3. Do lettere. Come misier Virgilio capitano di Goricia li havia mandato a donar uno sparvier, ma fu più presto per spiar. Per l'altra, che Dimitri Clada et Jacomo Promodino capi di stratioti erano venuti da lui a dirli: come uno Zuam Batista di Bom homo da Trieste era venuto da lhoro a dirli come a San Zuane tra Duim e Trieste è un Franzi stratioto venuto con danari per desviarli per nome dil ducha di Milan, et che lui provedador havia posto imboscada per haverlo in le man, et à abuto la verità de li capi et dil ditto triestin. Item, come alcuni stratioti erano andati a Crenons, loco de l'imperador, per parlar; et che uno stratioto à ditto el ducha dà ducati 6 per uno e una caxacha a li stratioti, per la qual cossa lo havia fato retenir et meter in fondi in torre.
     
      Da Crema, di sier Hironimo Liom el cavalier podestà et capitano, di 3. Come era ritornato uno suo messo da Milan; dice parlò a l'amico, mercore fo a dì ultimo lujo el ducha partì armato di tutte arme, et sopra vestito di rosso, e andò a Novara et Alexandria per proveder, vol redurse con lo exercito a la campagna et andar a scorsizar l'Astesam e Piemonte e Monferà, e brusar i strami: acciò non si possi alozar franzesi. Item, à levato di Novara di citadini e messi de li altri, et cussì di Alexandria ha levati molti guelfi et gibelini et mandati a Milan, et ha deputà homini d'arme 2000 contra franzesi, dice harà 6000 todeschi parte di li qual è zonta e provisionati paesani assai; et il conte di Cajazo è deputà da la banda di qua con homini d'arme 100, domino Francisco Bernardin Visconte homini d'arme 100, domino Marco da Martinengo farà la compagnia di homeni d'arme 100, misier Zuam Bentivoy e misier Hanibal suo fiol homini d'arme 200, la madona di Forlì e il fiol homini d'arme 100, et li balestrieri a cavalo 300, il re di Napoli li manda 400 homini d'arme, quali tutti sumano 1000 homini d'arme.