Da Vicenza, di rectori, di 4. Come haveano fato la descrition di homeni da fati, sono numero 3000, ben è vero molti erano andati in campo siché haverano dificultà, pur li haverà.
     
      Da Padoa, di rectori, di 4. Come domino Piero di Carthagenia condutier nostro di 100 cavali non pol andar in campo, et la compagnia non vol suo fiol per capo, et ha dato a homeni d'arme 14 et 5 balestrieri dil ditto li danari: siché la Signoria ordeni. Et fo parlato in collegio di dar al ditto condutier di provisionati 20 fiorini al mexe in vita sua, e la compagnia a Filippo Albanese.
     
      Item, Alvixe Venier exator a Padoa di le dexime dil clero per le cazude, scrisse a la Signoria come non poteva scuoder cussì perché lo episcopo de lì pagava colte a li provedadori sora le camere, et cussì l'Abacia di San Felixe ...
     
      Da Feltre, di sier Marchio Barbaro podestà et capitano, di 3. Come quel zorno havia auto uno aviso da Juam di Bernardin Cornexin da Bassan: come in quella matina a dì 3 era venuta nova di sguizari haver roto il campo regio con gran mortalità di persone, e à mandà per le piegore è sui monti. Intrò li cai di X dentro et feno lezer alcune lettere.
     
      Da poi disnar fo pregadi. È da saper, l'ultimo consejo di X fo preso di retenir uno prete oficiava a San Zaccaria, dicea messa a l'orator di Milan, e si dice li rivelava secreti; adeo fu preso, et etiam alcuni altri, e butato il collegio tochò a sier Polo Barbo consejer, sier Cristofal Moro cao di X, sier Polo Pixani el cavalier avogador et sier Baldissera inquisitor, et stete quando fu preso fin hore 7 di note a la corda, tamen poi ben examinato non trovono nulla et fu lassato, et cussì in questo zorno ditto collegio andoe in Camera.