Item, per un'altra lettera, di 25 lujo, scrive esser stato lì sier Zuam Malipiero soracomito, et di homini à compito di armar; et uno schierazo patron Nicolò Alegreto et do caravele quale fono expedite di homeni. Item, haver Scander bassà volea corer su quel contà, solicita siano expediti di qui li oratori di quella comunità, et voria ducati 300 da spender.
     
      Da Zara, di rectori, di do. Nulla da conto, solicita proveder.
     
      [1039] Di sier Augustin Malipiero capitano di le fuste in golfo, di do, da Zara. Avisa il suo zonzer lì, et haver scritto a Veja et Pago per la fusta.
     
      Da Corphù, dil rezimento, di 17 lujo. Non hanno che scriver di novo, mandono questa per recomandarsi, et stanno di bon animo.
     
      Da Nepanto, di sier Domenego Malipiero, provedador di l'armada, di 8 lujo. Di quello havia fato, li ha fortificà la terra, fato cuocer calzine, et à mandà sier Marin da Leze soracomito a soraveder. Item, erano li 8 bombardieri in discordia; et havia fato un capo di ditti, et comesso il fortifichar dil castello a sier Rigo Badoer qual si ritrovava lì con uno suo navilio, et libenti animo aceptò tal provintia.
     
      Item, haver mandato sier Marin di Leze con do galie al Fitileo a soraveder di l'armada turchescha, qual era tornato et nulla risposto, et ricevute lettere dil zeneral, unde li convien andar a Modom. Et mandoe alcuni avisi, et deposition de homeni lì che il Turcho era morto, siché quello ha avisa.
     
      Item, fu lettere di Candia vechie, le qual non fono lete.
     
      Di Cipro, di sier Andrea Venier, luogotenente, et consejeri date a Nichosia, a dì 15 mazo.