Et quando andò esso orator a tuor licentia, il ducha disse ve la daremo adesso si volete, et lui rispose veria un'altra volta a tuor comiato da soa excelentia, e poi li fè letere di passo, e do scalchi lo compagnò fuor dil teritorio suo. Item, havia spexo in quella legation di mexi 28 in ordenario ducati 2786, in extraordinario 334, in salarii 679, in cortesie 50 ducati, summa tutto ducati 3849, et potea spender ducati 1800 più. Et vene zoso di renga; et che 'l ducha havia dà taja a Novara ducati 30 milia. Et sier Luca Pixani el consejer vice doxe lo laudò, poi ritirato a sentar, era di la zonta.
     
      Fu posto parte, per tutte tre man di savii, di dar grossi 22 per testa di quelli anderano su la barza, a sier Sebastian Moro, qual li fazi le spexe, et per sua cauzion li sia ubligato le decime dil clero si meterano, detrati prima ducati 10 milia, et quelli fosseno anziani. Et have tutto il consejo. Et è da saper si scuode per ogni decima de' preti, ducati 20 milia.
     
      Item, fu posto, per nui savii ai ordeni, mandar una fusta di l'arsenal a Sibinico, atento quelli si oferiscono armarla lhoro e star a custodia, etc. Have solum una di no.
     
      Item, fu posto, per li savii dil consejo e di terra ferma, di astrenzer le do decime ultime dil Monte nuovo sono ai governadori per tutto sabado, aliter siano mandati debitori a palazo; et ditta parte have tutto el consejo, e fu presa.
     
      Item, fu posto, per alcuni consejeri et i savii sopraditti: di scriver a l'orator nostro a Roma, debbi dir al pontefice lo episcopà di Trevixo zà 15 anni esser stà dà al vescovo di Rossi, et hessendo hora manchato domino Nicolò Franco, soa santità voglii darlo a ditto di Rossi; e poi sia scritto a Roma per la nomination di quel di Cividal dove è il Rossi.