Item, el ducha ha fato far suso a Bisignano uno ponte su burchi 36 per passar zente d'arme propinquo a Alexandria, et à posto guarda ai burchi. Item, a Brignano, loco di domino Francesco Bernardi Visconte, et a Fontanelle, Coffo, et Antignano ha posto le sbare, et a betolado per mezo Quinzam ha spianà lo borgo, et a Zivolta che è propinquo a Barco, loco di fioli fo di misier Leopoldo da Martinengo, havia fato quel medemo; siché si fortificava.
     
      Per l'altra lettera, di 8 da sera. Avisa a Lodi esser il cardinal Ascanio venuto eri sera. Et quel zorno si aspetava lì el ducha qual era a Margnano, et ancora non havia visto ditto suo fradello Ascanio, et poi dieno partir doman per Milan. Item, avisa dil ponte fato sora Po su burchi, et sora Adda le fortification, et bastioni fati far.
     
      Da Brexa, di rectori, di 8. Come Zuam da Fel tre contestabele a Pontevio era stato da lhoro, dicendo esser stato in Cremonese, et che uno cittadin li havia ditto voria la Signoria fusse col campo lì apresso, perché il ducha à mandà li 500 fanti, et vol le taje, et hessendo el campo non pageriano, imo farìano novità. Et ditta lettera, leta in collegio, fo ordinato per li savii non si dovesse lezer in pregadi.
     
      Di sier Marchio Trivixam provedador zeneral, di 8 da Brexa. Come il conte di Pitiano non si contentava di 100 homeni d'arme si dava al fiol, vol danari per imprestedo, et altre particularità ut in literis.
     
      Da Verona, di rectori, di 9. Mandono una lettera dil marchexe di Mantoa, qual li scrive voria mille some de carboni trar dil veronese, non li hanno risposto nulla, aspeta risposta da la Signoria nostra.