Eri el magnifico zeneral have lettere dil podestà di Malvasia, scrive haver visto l'armada distenderse dal porto de le Bote verso Malvasia vechia, adeo dice intendemo di zorno in zorno e de hora in hora, per esser hormai arivata in queste nostre aque, si atende a star preparati, è in hordine da far fati, prega Idio doni bona fortuna e vitoria contra questo can impio. Tutti quelli dil Brazo hanno mandato, digando son disposti transferirse de lì, a' nostri [1056] non se li ha fato altro, dice lui li aceteria si a lui stesse. E secondo l'opinion sua ditta armata va a Nepanto overo a Cataro ai nostri danni, la qual si questo magnifico zeneral non l'ha investirà adesso, crede non harà bona opinion, né sarà laudato imo serà gran male, et perde la de cristiani se de qui la lassa andar scapulla. In questo interim è zonto il provedador Guoro vien di Napoli, el qual ha trapassato l'armata turchescha, et quella si trova di qua a Cavo Matapan, che de hora in hora, ut supra, l'aspetemo.
     
      A dì 8 del presente. Vene nova, per lettere di Corom ch'è di ditto, per il deponer di uno vene da la Morea de dì 27 zugno, el qual parlava per bocha de uno suo fratello, come el campo turchescho seguiva lo suo camino verso la Morea, et l'armata verso ponente e a Corphù, et era comandato a tutti di la Morea, dovesseno asunar le lhoro biade.
     
      A dì 9 ditto, hore do di zorno, per lettere dil magnifico misier Domenego Malipiero provedador di l'armada da Lepanto de dì 5 dil presente, per le qual se intese: come per una lettera de uno fratello de uno citadin da Lepanto che se atrovava in Andrianopoli, fata di 25 zugno, aferma come il Turcho partì a dì 24 ditto, et arivò a Frisopuli a dì 27 lontan dal ditto, et li fè poner lo ambasador del re di Napoli in prexon, et de quelli castelli fazeva trar fuora tutti li cristiani per dubito, et che l'armata dovea partir a dì ditto 24 da Galipoli, et andar verso Negroponte, et che aferma voler andar in Puja.