A dì ditto, a hore 4 de dì, per lettere da Corphù de dì 7 del baylo, per la deposition de uno spion, aferma il suo partir a dì 29 de Andrianopoli, et come il Turcho atendeva a Corphù, e cussì l'armata.
     
      A dì ditto, a hore 8 de dì, per lettere dil magnifico provedador Malipiero, de dì 6 da Lepanto, aferma, per vera via, a dì 2 ditto del zonzer dil campo turchescho in Vardari, loco lontam da Lepanto 3 over 4 zornate, nel qual locho, el campo pol piar più vie, et che l'armata a dì 24 zugno dovea partirse a la volta di Negroponte.
     
      A dì 29 di note, venendo di 10, zonse la galia sopracomito misier Polo Nani, la qual era in Andres a guardia de l'armada turchescha, et afermò come l'armada era ussita a dì 7 ditto, a hore 9 de dì, discoperta da lui a Cavo Mantello.
     
      El numero de la nostra armada, ch'è fin qui: si atrovano galie sotil 45, galie grosse 6, nave armade 21, computando 7 di Candia e do di azonte, con arzieri 700 et altri in numero di 36.
     
      [1057] A dì 12 ditto, zonse una fusta rodiana da Napoli de Romania, con lettere dil magnifico provedador Guoro, de dì 9 ditto, e con homini do da Scyo per la qual se intese la vista de l'armada navegando verso cao Mantello, e ben fusse vento fresco, tamen erano lenti, et non veteno più di velle 90 in 100, con quatro velle di nave grosse, et aferma non haver visto più, et era tempo chiaro, et steteno fin sera per descoverzer.
     
      A dì ditto la magnificentia dil zeneral deliberò, atento che non era rimaste galie in quelle parte per le qual se potesse saver nuova, non obstante che di terra siano fati hordeni con fochi et altro, di mandar il magnifico provedador Pexaro con galie tre a la volta de l'arzipielago cautamente fina che di la armata se ne possi trar el construto, et cussì partì a mezo zorno.