De che fo molte et varie opinione, parte de star a la terra, et parte star a le volte, maxime alcuni dicendo el star qui a la terra esser pericoloso, e el mazor numero concorse star su le volte, tamen la opinion del magnifico zeneral a hora non se intende, ma al tempo de bisogno disponerà segondo ch'è la sua solita prudenzia, che non pol esser se non bona.
     
      Item, in ditto dì 12 a hore 2 di note ritornò el magnifico provedador Malipiero da Lepanto con le sue conserve, et narò le sue provision fate, et quetation di populi, et à menà seco tre cittadini di la terra, homini scandolosi et quasi sospeti. Al partir suo da Lepanto, che fo a dì 10, disse haver inteso el campo turchescho esser in tal modo: al Vardari tre flambulari el suo capitano a Frisopoli, la persona dil Signor turcho in Andrianopoli, la qual persona si disse fin hora da alcun esser stà vista, poria fazilmente non esser partita.
     
      Item, per lettere di 29 dil passato da Syo inter alias v'era l'armada turchescha, prima manchar nel numero, et poi esser mal in hordine, et cussì è da creder; altro fin questa hora non se intende. In Modom, a dì 13 lujo 1499(7).
     
     
      [1499 08 11]A dì 11 avosto. In collegio da basso. Vene domino Zuam Batista Carazolo capetanio di le fantarie, per tuor licentia dal principe, et ozi si parte, et va in campo; et dete in scrittura uno aricordo di molte cosse, inter caetera vol siano fati certi canoni per Sperandio et un altro, et non l'artilarie erano stà ordinate si fazi, per non esser quelle bone per campo vol non sia dato danari a li contestabeli, ma homo per homo di man dil pagador nostro colateral, et vol il suo canzelier sia scontro, acciò la Signoria non sia inganata; et disse voria tuor di qui 4 over 5 contestabeli, acciò facesseno li soi provisionati concessi, et lui haver libertà cassar li fanti, et impicharli.