Et per collegio li fo risposto non andasse a parlar esso provedador al ditto domino Antonio di Agresta per niun modo.
     
      Da Urbin, dil ducha. In recomandation di Pyro da Cesena qual si voria conzar a soldo di la Signoria nostra.
     
      Fo parlato in la materia di trovar danari e scuoder li debitori; et sier Zorzi Corner el cavalier referì haver ordinato le artilarie al modo vol el capitano di le fantarie et à partecipato con tutti. Item, fo risposto a la lettera dil conte di Goricia recevuta per avanti. Et è da saper la nave di comun Mora expedita porta ducati 8000 va in Cypro; etiam la nave di sier Bortolo Contarini el cavalier eri partì.
     
      Et in piazza fo divulgà esser lettere di 28 lujo da Nepanto: che uno corier andava dal Signor a dirli l'armata sua esser stà rota da la nostra, tamen in collegio di questo nulla era.
     
      Da Curzola. Vidi una lettera di sier Alvixe Balbi conte di tre avosto a suo fratello. Come havia expedito di armar tre caravelle e con gran faticha le armoe, et eri partiteno insieme con la caravela di Sagredi e quella di sier Dardi Moro. Item, auto lettere di sier Nicolò suo fratello fata in Pastrovichij: avisa esser stà in Antivari zorni 10 e haver assetà quelle diferentie tra quelli cittadini con honor di la Signoria, et era venuto lì in Pastrovichij per alcune altre fazende le qual spera asetar subito; e li scrive turchi à corso su quel di Dulzigno e fono a le man con i villani dil contà apresso le porte di la terra dove fu morto uno turcho e molti feriti da freze tosegade senza lesion de' nostri, solum uno fo ferito, et etiam in Antivari sono stati 4 milia lontan da la terra, non hanno fato dano alcuno salvo de certi pochi animali amalati, e vilani li fono a l'incontro per modo che quel subassi lassò la caxacha, simitara e tutto quello l'haveva e ave di gratia a scampar.