Di sier Marchio Trivixam, provedador zeneral, di 11 apresso Brexa. Come era stato lì el conte, con il qual con li rectori et lui havia parlato, et è molto satisfato di la liberation dil suo milanese, et disse voria si andasse in campo 7 mia lontano da Brexa a Cavriana. Era in questo consulto el conte Bernardim qual non parlò, et Zuam Paulo Manfron laudò questa opinion, ma voria passar col campo di là dal ponte di Ojo presto su quel de inimici; vi era etiam el conte Alvixe Avogadro; et che lui provedador atendeva a far li provisionati, li dà una paga, et aspeta l'orator francese et l'altro provedador suo collega zonzesseno. Item, ha Ascanio esser andato a Milan.
     
      Da Riva, di sier Hironimo Baffo provedador, di 11. In risposta zercha debbi lassar passar et honorar venendo de lì via nium orator dil re di romani va in Savoja o altrove, et disse cussì farà.
     
      Da Roverè, di sier Nicolò da cha da Pexaro, podestà, di 12. Come passò de lì misier Zuam Grandener proposto di Brexanon, fo alias orator a la Signoria nostra per nome dil re di romani, qual andava a Milan con cavalli 10, era stato a Trento zorni 8. Item, che misier Zuam da Feltre era stato lì, el qual à ringratià la Signoria di haverli usato le parole l'usoe, et che quelli di Besem lo tene a disnar, qual voleva venir lì a Roverè, et li disse era mejo al re acostarsi a la Signoria nostra, et l'orator rispose ancora è tempo.
     
      Da Feltre, di sier Mathio Barbaro, podestà et capitano, di 12. Haver da uno explorator tornato, el campo di Venosa s'ingrossa, et esser 2000 persone; et che il re havia comandato tutti de lì via porta arme vadino in campo.