Item, il Signor è col campo a Monestier in mala convalescentia, et con lui il flambular de la Janina, Mustaffà bassà di la Valona, el flambular de Lodoruzi, et zente di la Natolia: pol andar o a Corphù o a la Valona o a Durazo o a Cataro. Al Vardaro è Milarbei con 18 flambulari, overo flambuli di la Romania con persone da 35 in 40 milia, et se divulga verano a dano di Nepanto; et questo detto Milarbei à per uno ... flambuli, ch'è capi di 500 cavalli l'uno, come io intisi. Item, scrive l'armada va a Corphù, et per avisi da Setines ha che 5 galie: et 4 fuste dete in terra et si rupeno, et esser anegati, poi partì l'armada da Constantinopoli 2500 persone, qual armada pol esser 80 galie, nave 20, tra le qual do grosse fuste, 130 galeaze, tra el resto palandarie et schierazi fin al numero di velle 340, et che a Trabesonda fo armà 50 galie per forza, et vene con una malatia che morivano molti, adeo sì ditte galie steva tropo con l'altra armada quella ruinava, perché apizò la dita malatia, et eran morti da questa 25 homeni per galia; et che quelli di l'arma manza suguli et formazo et bevono aqua, sono amalati assai, et si potesseno meter scalla in terra scamperiano, et si vederano la nostra armada [1074] darano in terra, et dicono nel voltar di le velle sono anegati assai, et a Negroponte è stà impichà 80 turchi fuziti. Et esso arziepiscopo scrive havia voluto restar lì, et era stà ruinato 180 caxe per fortification di la terra, le qual le dava de intrada ducati 180 a l'anno, siché restava solum su 26 in 30 ducati d'intrada, et disse non poter viver, si raccomanda a la Signoria nostra.