Per l'altra mandono il conto di danari dil subsidio dispensati a le zente d'arme.
     
      [1078] Di Raspo, di sier Daniel da Canal capitano, di 10. Como Jacomo di Lepori, qual fu mandato in la Crovavia per intender de' turchi, referisce Scander bassà haver pocha zente, non ha 5000 persone, et Mustafà suo zenero esser a Medeo loco dil ditto Scander in Servia.
     
      Di Caodistria, di sier Alvixe da Mula podestà et capitano, di 12. Manda una lettera abuta da Jacomo Lepori, qual è stato a Brigna, la copia di la qual sarà qui soto posta. E avisa in Bossina non esser 5000 turchi; tamen da Castelnovo à il contrario, come turchi vien in campo a quelle bande; et esso podestà crede di questo sia stà Frangipani che li habino mandato a dir a quel castelan tal nove, nil minus sta preparato. Item, per un'altra lettera, scrive zercha li custodi mandati a Castelnovo e Montana quali doman ch'è a dì 13 compivano il mexe: perhò la Signoria li mandi danari. Et cussì in questa matina fo balotato ducati 80 da esserli mandati a questo effetto.
     
     
     
      Relatione di Jacomo Lepori justinopolitano,
      mandata al podestà et capitano di Caodistria.
      Avisa di le cosse de' turchi di Scander bassà.
     
      Magnifice et clarissime domine. Secondo la comission data da vostra magnificentia, prima auto i cavali, de comandamento de quella son andato a le parte di Corvatia. Noto fazo mi Jacomo Lepori come essendo andato per intender de nuove de' turchi in le parti di Crovatia ho inteso le cosse sotoscritte. E prima fo mandà da la porta Scander questa quaresima, el qual bassà si è quello che fo el primo che feze coraria qua in Istria, et fo quello che rompè el campo in Friul, el qual vene in Bossina per far corarie ai luoghi de la Signoria nostra, el qual è savio et secreto, e tutta la so zente tra turchi e bossenesi a mala pena sarà 6000, i quali stanno poi divisi in qua e in là per Bossina et per Verbosana, i quali in tre dì li poi far asunar insieme, et cussì feze quando fè la coraria su quel di Zara, fono 2500, li asunò in do dì e subito se partì de lì, che nì turchi non sapea dove volesse andar in coraria et feze el dano che se sa, e ha mandà messo al Turcho a dirli se 'l vorà dar zente che l'anderà tanto che el vederà Veniexia.