Da Ragusi, dil Gondola. Non scrive di che zorno, salvo che 'l campo dil Turcho è a Metalo, et l'artilarie aviate verso la Morea et l'Albania. Disse darà da far a le terre, et judicio suo l'armada sua tegnirà occupata quella di la Signoria nostra, etc.
     
      In questa mattina vene in collegio sier Faustim Barbo savio ai ordeni, nostro collega stato a Roma alcuni zorni, qual andò con sier Polo Capelo per caxon di certi beneficii per il suo fiol.
     
      Da poi disnar, da poi vesporo per esser la vezilia di nostra Dona, el collegio di savi si redusse a consultar. Et è da saper tutta la terra stava in expectation di udir qualcossa da mar, sperando vittoria in la potente nostra armada, et nel gran animo di sier Antonio Grimani procurator capitanio zeneral; et se intese a Corphù si havia fato far uno crocefixo per quello levar come vexillo quando sarà per combater con l'armata dil Turcho. Item, fo ditto, uno certo maistro da Bassan era venuto a dir al principe: come nel suo orto li era parso San Marco, dicendoli alcune parole, et che el dì nostra Dona di avosto la Signoria haverà la nova di esser rota l'arma dil Turcho. Item, fo ditto che l'astrologo dil ducha di Urbim havia scritto de qui la Signoria nostra contra turchi auta vitoria, ma di nulla fo vero.
     
      Da Brexa, di sier Marchio Trivixan [1080] provedador zeneral di ... Come era impazà con li provisionati, quali voriano page. Aspeta risposta di quello à da far; et Zenoa è zonto li; et ozi monsignor di Beumonte orator franzese. Li andò contra sier Polo Trivixan el cavalier podestà et lui con assai cavalli, et fo molto honorato, etc.