Da Gradischa, di sier Andrea Zanchani provedador zeneral, di 14. Come mandava avisi abuti da Caodistria, da Castelnovo, da Vegia, in conformità turchi dieno venir in Friul; et che 'l signor Carlo Orsini à ditto esser pocha zente in Gradischa, et venendo turchi verà per altro che per corer. Conclude voria 2000 fanti forestieri, vol monition etc. Et che era mal levar de lì Zuam Griego acciò non vada la fama el si levi; et ozi fo balotà di mandar lì stera 1000 orzi, e zà è stà mandati.
     
      Di sier Marin Boldù provedador di Gradischa. Era amalato et veniva via justa la licentia; et in suo loco fu electo sier Bortolo di Priuli, fo la muda passata mio colega savio ai ordeni, e andò.
     
      Di Albona e Fianona di sier Alvixe Bembo podestà, di 11. Come venivano a la Signoria do oratori di quella comunità di Albona, zoè Bernaba Lorensich nontio di Fianona e sier Michiel Lucranich di Albona, et dice le mura di Albona esser mal conditionate e ruinade, vol monition: etiam fu comessa a nui.
     
      Da l'Abacia, di sier Alvixe Bembo podestà, di 14. In risposta di do bombarde si trova de lì soto la loza, qual sono invidà, et fono mandate a tempo de' franzesi, et è bone. Lauda queli cittadini, et li fo risposto per collegio le dovesse mandar, et fo mandate a tuor.
     
      Da Ferrara, di uno Zuam di Peraldo spagnol, di 14. Come mandava uno messo de qui; voria far fanti 1000 et menarli in campo, si cussì piacerà a la Signoria nostra.
     
      Vene alcuni milanesi richi abitanti in questa terra et merchadanti, et dimandò la Signoria li piacesse farli dar il salvoconduto, et li fo risposto non dovesseno dubitar e stesseno seguri.