Item, hanno aviso a Traù sono venuti alcuni turchi per danizar. Item, per do da Zara fuziti, fono fati presoni da' turchi, venuti par la via di Ragusi, dicono Scander esser ito a la porta, et à lassato la preda fata su quel di Zara in certo loco, et nel capitolo hanno auto da Spalato per turchi portano con si gradizi per quelli casteleti o per le mure di Sibinico.
     
      Di Sibinico, da sier Vetor Bragadim conte, di 8. Come per uno patron di uno navilio, vien di Puja a dì 29 lujo, disse passò sora Napoli 40 in 50 velle [1106] francesi, et il re mandò una fusta per saper chi fosseno, et lhoro mandò do galie contra la ditta, et quelli di la fusta scampono via, et le galie tolseno la fusta. Item, per uno venuto da Cataro, è zorni 6 partì, à inteso el Signor turcho esser in Scopia con 100 milia persone, à mandato a preparar coperti a la Valona, et che l'armata dia passar in Puja. Item, à aviso da Spalato che Synam voyvoda del Monstar dia corer a danni di la Signoria in Dalmatia, per tutta quella settimana. Item, di li ducati 200 li fono mandati à speso più di la mità in reparar le mure di Gerbaz, dove si redusse quelli poveri citadini con li animali, dil resto à dato meza paga a quelli poveri soldati.
     
      In questo pregadi fo messo parte, per li savii dil consejo et di terra ferma, scriver a li provedadori nostri generali in campo cussì: come terzo zorno li scrisse dovesseno andar in campo sul nostro, et celerar, cussì al presente volemo vadino col nome di Dio a la iruption contra il ducha di Milan dove li par meglio, usando crudeltà a li nemici, et amor e ben a quelli verano voluntari a la deditione di la Signoria nostra; et che mancha solum quelli di Urbim, Rimano et li fanti di Roma, quali statim sarìano in campo, et sì ben non erano zonte le artilarie non restasseno per questo, havendo perhò advertentia lhoro provedadori col conte di Pitiano governador nostro a la conservation di l'exercito, et che celeri la cossa.