Di ditto podestà et capitano, di 21. Come per uno venuto quel zorno ha: che venere a hore 23 franzesi ebeno Anom, et poi bombardando la rocha l'ebeno la domenega, fo a dì 19 a hore 21, per forza, trato prima colpi 300 di artilaria, et eran morti in dar la bataja 300 francesi, et poi esser andati col campo a Valenza; siché cussì avisa la Signoria nostra.
     
      Di Bergamo, di rectori, di 20. Haver, per uno venuto da Milan quel zorno: dil prender di franzesi di Anom, et esser poi andati a campo a Incisa, et haver auto Castelazo, et che 'l ducha a Milan feva 200 [1119] fanti et li mandava in Alexandria, et che misier Bernardin Visconte li havia mandato a dir se non mandava zente in Geradada lui si leveria, qual è a Brignam.
     
      Da Brexa, di provedadori zenerali, di 21. Come quella mattina a hore 17 el conte di Pitiano si partiva da Gedi per andar in campo sora Ojo, et andava a veder li alozamenti verso ponte Ojo, et zà tutti se aviavano, et lhoro provedadori vano la mattina seguente, et l'orator franzese restava fin sabato a Brexa per fornirse, et hanno posto a camino le artilarie, resta il cortaldo et una bombarda grossa lì a Brexa. Item, che l'orator havia abuto il pavion, manchava darli il cavallo et non si trovava se non uno di Lazarin da Rimano qual vuol ducati 200, et ditto cavallo piace a l'orator. Item, aricordano si mandano danari per la paga, quali sono zà in camino. Item, che Piero Pagnam scrivan di quella camera, stato a Casal dal signor Constantin alcuni zorni et tornato, referisse come era stato a Casal amalato, et par che 'l signor Constantin sia suo parente, et ha auto nova da misier Zanni di Anom suo orator era in Franza, qual tornò a meter hordine a li cavalli, disse che misier Zuam Jacomo Triulzi et monsignor di Obignì non aspetano la venuta dil roy, tamen che verà di qua da' monti, et va a tochar la man a la raina, poi con 5000 homeni di la sua guarda vegnarà in Aste, ha fato far la descrition di le zente dil Dolphinà, et il roy haver ditto ho zente et danari, et si intervenisse nulla vol poter socorer le sue zente di persone 30 milia.