Et se l'acaderà con el nome de Dio tuor l'impresa contra inimici, per il ditto magnifico zeneral et per i ditti magnifici provedadori sia comandà ai sopracomiti che vadino ad investir con la sua galia in algun luogo, tutti queli sopracomiti che subito non obedirano et non vadino ad obedir quanto li sarà comesso o tepidamente sapiano non solo esser privi de la sua sopracomitaria ma etiam di la vita.
     
      I comiti veramente che non obedirano al magnifico zeneral, over provedadori, ma vorano far al modo di soi patroni, siano apicati per la gola non investendo.
     
      Et domente che durerà la bataglia, alguna de le galie et legni nostri armati possi soto pena di la forcha far botin alcun, si non fata che sarà la bataglia, e si alcun contrafarà sia acusato e lo acusador habia tutto el botin, et el contrafacente sia punito.
     
     
      NAVE GROSSE.
     
      La barza dil capitanio.
      La nave Armera.
      La nave Pandora.
      La nave Marzella, era in ponente.
      Nave di bote 800 in zoso fin 200, computà maran, numero 29.
     
      Galie grosse N. 16
      Galie sotil " 44
      Gripi et fuste " 15
     
      Summa velle N. 108
     
      Et è da saper, più avanti sarà descrita l'armata potentissima di la Signoria nostra più difusamente con altro modo et hordine.
     
     
      Da Legena, di sier Lunardo Marzelo rector, di 27, al capitano zeneral. Come di l'armata turchescha vene do fuste grosse e uno brigantin a cao di quella isola, e menò via 7 homeni et 300 capi di animali, poi brusò caxe, et poi vene una fusta dil flambular di Negroponte e menò via do homeni et 17 cai di animali. Prega esso capitano scrivi al capitano di ditta armata e fazi restituir quelle anime, et che tamen ditti turchi danizano, mostrò di venir con volontà dil suo capitano a la scoperta a danizarli.