Di sier Antonio Moro baylo et capitano, sier Piero Morexini et sier Hironimo Cavatorta consejeri di Corphù, di 9. Sotoscritta regimen Corphoi et [1129] sier Andrea Loredan provedador insieme. Scrive come in quella hora esso provedador partiva con 1000 homini et 20 navilii tra gripi et schierazi, et 8 caravele zonte eri lì, et molti cittadini di Corphù vien con lui; et si ne l'andar intenderà la nostra armada have preso o rota la turchescha anderà a Nepanto a custodia di quella terra, et intendendo l'armata turchescha venisse a Corphù ritorneria prima lui a Corphù: par sia stà chiamà dal zeneral, et etiam lui fè il consulto con il rezimento come scrisse, et che esso baylo farà ogni provision.
     
      Da Otranto, di sier Piero Nani governador, di 30. Come mandava queste lettere duplicate abute da Corphù.
     
      Da Trani, di sier Alvixe Contarini governador, di 16. Manda dite lettere. Et ha recevuto la nostra zercha el merchà dil biscoto, quel merchadante non vol se non ducati 6 e vol i danari contadi, et come il formento monterà cussì vol cresser il precio. Item, à stera 10 milia di orzo. Et per collegio fo risposto debbi concluder ditto mercado di biscoti al mejo el puol.
     
      Item, fo chiamato li provedadori a le biave sier Jacomo da Canal, sier Alvixe Contarini e sier Jacomo Gussoni, et ordinato mandi biscoto in armada; et fo nolizato uno meram di Zuam dal Cortivo per questo.
     
      Da Monopoli, di sier Tomà Liom governador. In risposta di una lettera li fo scritto per la Signoria vedesse di haver qualche cavalo cao di lanza, dice non ne esser perché li comessi dil ducha di Milan li ha tolti per tutto.