Et per il principe li fo ditto di l'andar di le zente nostre in campo.
     
      Da Liom, di l'orator nostro in zifra, di 28 lujo, 4 e 5 avosto. In la prima come il re atenda ogni hora a la expedition de l'impresa et a spazar zente; et eri fo da sua majestà li disse nove de' sguizari, manda i reporti, e poi parlò al cardinal Roam justa li mandati regii, qual li disse el Bastardo di Savoia esser stà dal roy e ditoli s'il crede la Signoria nostra serverà quanto ha promesso, rispose el roy de sì perché ha lettere, ha posto le zente a li confini, et lui dimandò perché el signor Lodovico tirava le so zente di confini di la Signoria e le mandava contra franzesi, e il re li disse li piace perché con più facilità la Signoria otegnirà da la sua banda; poi el cardinal disse a l'orator: amore Dei fè la Signoria atendi a le promesse; et che il roy ha ditto misier Zuam Jacomo Triulzi haverli scritto come la Signoria per mantenir la fede feva etc., et esso orator rispose optime dimostrando si la Signoria non volesse non haria risposto come la fece. Poi disse che fiorentini hauto Pisa daria favor al signor Lodovico, e il re Fedrico li dava 300 homeni d'arme et 2000 pedoni. Item, esser venuti lì uno heremita per nome de' pixani a pregare el roy li aiuti, qual non havia lettere di credenza, si havesse auto haria fato qual cossa, et il roy non rispose nulla ma mandoe uno secretario a dir a li oratori fiorentini si risolvano, aliter farà retenir li fiorentini tutti sono in suo poter. Item, intese el roy andava verso castel Romorantino e il cardinal disse: l'ho consigliato vadi et non stagi a veder scaramuzar, né prender castelli, ma andando non starà in tutto tra andar et tornar zorni 15; et poi il roy vol andar in Aste, ma prima aspetar il parto di la raina; tamen il cardinal li ha ditto il roy haver ditto che havendo mandati tanti zentilhomeni a l'impresa non voria intervenisse qualche mal, e prima lui voria morir.