Item, el gran prior di Franza li ha ditto l'armata di Provenza di velle 22, videlicet nave 16, galeaze 4 e bregantini 2, esser partita da Provenza zà più zorni, et uno dì avanti li zonse li corieri con le lettere regie di l'hordine havesse ad andar a servir la Signoria. Item, esso orator fo dal re a dimandarli si andava o no, rispose di no, ma voleva far ridur lì a Liom la raina. Item, feva cavalchar li pensionarii [1133] in Aste che sarano lanze 100. Per l'altra lettera di 4 avosto: il re haverli ditto a Ginevra esser zonto sguizari 2000, siché sarano 4400 in campo et ne pol haver numero 10 milia, e poi l'orator parlò col cardinal Roam qual li disse esser lettere di oratori dil roy apresso il re de' romani: come quel re li havea ditto voler partir in Italia insieme col roy da boni fradelli e a questo modo faria l'acordo con sguizari come vorano, zoè lasserà tuor Milan al roy et il stado di la Signoria sia lassato tuor a lui, aliter si faria prima turcho che lassar tuor Milan al roy, et che 'l ditto cardinal li disse: el roy vol andar da la raina; et l'orator nostro exortò al tornar presto, lassava de lì el cardinal, et gran canzelier e lo so consejo. Item, scrive esso orator non poteva mandar lettere de qui come el voria, perché misier Zuam Jacomo ha scritto non ha modo di mandar lettere de qui se non con gran spexa, perhò non scriva se non è importantia. Per l'altra di 5 avosto: come il re havia spazà lettere al papa e diversi principi di Germania danando el signor Lodovico che havia fato venir turchi contra la Signoria.