Da poi disnar fo pregadi. Vene il principe, e poi leto lettere.
     
      Fu posto parte per li consejeri: che ogni zorno di la setimana futura sia chiamado el pregadi e tutti vegni soto pena di 10 ducati, a requisition di sier Hironimo Capello stato provedador per le camere, et have 27 di no e fo presa: vol menar sier Francesco Corner fo camerlengo a Padoa.
     
      Item, fo posto, per li savii dil consejo e di terra ferma, dir a l'orator ispano è qui, ritorna in Spagna, zercha le cosse dil Turcho, et danar il signor Lodovico, et donarli 20 braza di veludo negro. Have 9 di no, il resto di la parte e fu presa.
     
      Item, fo posto, per li savii preditti e nui savii ai ordeni, di scriver al provedador di Cataro togli Zupa a la Montagna negra con queli pati li par; have una non sincera, 3 di no, 172 di la parte. Et è da saper fo mio aricordo che niun si ricordava di questo.
     
      Item, fo posto per lhoro savii la parte di le gracie di le vendede di le caxe, cossa molto crudel et longa; contradixe sier Gasparo Malipiero era provedador sora i oficii; li rispose sier Filippo Trum procurator savio dil consejo, sier Polo Pixani el cavalier l'avogador volse andar in renga; et fo terminato diferir, etc.
     
      Item, fo posto per li ditti far 2000 provisionati di castelli e teritorii nostri, exeptuando il Friul e trivisan e sia fata la mostra per li capitani e vice colaterali, con ducati 3 al mexe, zoè uno ducato pagi la Signoria e do lhoro, e siano mandati in campo, et non hessendo boni homeni queli dil comun pagino un bon. Et cussì poi in execution fo fate le lettere et compartito per li teritorii zoè Padoa e li castelli provisionati 500, visentin e li castelli 500, veronese 300, brexan 200, Asola e la squadra 100, Salò e la squadra 100, Bergamo con le valle 300, che vien a sumar tutto provisionati 2000 e fo mandato via.