Item, domino Ventura depositario dil papa voria li 500 ducati prestò per li fanti, et il reverendo datario si racomanda, quasi dicat voria etc., per la bolla di le decime. Et noto sier Filippo Trum procurator disse havea inteso questo Trivixam prothonotario havia venduti li soi beneficii per comprar questo.
     
      Da Ravena, di sier Alvixe Venier podestà et capitano, di 22. Esser zonto lì li fanti venuti di Roma, fa le mostre et dà li danari, et cussì è zonti quelli di Urbim et le zente d'arme, et fo scritto a Chioza sia preparato da passar, et passerano a monte Alban.
     
      Vene l'orator di Franza, et mostrò lettere dil roy a lui drizate, di 5 da Lion, et dil cardinal di Ambosa over di Roam, di 6. Lauda la Signoria nostra, conforta li oratori a perseverar in solicitar quella, et monsignor di Beumonte vadi in campo nostro et lui major judice romagni. Quanto al tempo et il loco di romper a Milan à scritto a misier Zuam Jacomo suo locotenente di qua da' monti che à la praticha, avisa et ordina quando; et che lui andava da la raina a castel Romorentino, sarà statim de lì; et come dice una lettera tornerà et sarà a Lion a dì 23 per non si partir et atender a l'impresa. Et poi esso orator fè mandar tutti fuora, et come intisi disse sospetava li fanti vien da Roma, non sieno desviati dal signor Lodovico per uno sospeto l'ha: li fo ditto non dubitasse si prevederia.
     
      Vene l'orator ispano domino Gualtier comandador, acompagnato da sier Marco Dandolo dotor et cavalier et sier Zuam Badoer el dotor, et li fo leto per Gasparo quello fu preso di dirli di le cosse dil Turcho, et come l'armada nostra era potente, et che 'l Turcho era potentia formidabile, et siamo l'antimural di la cristianità. Poi disse dil ducha di Milan, li beneficii recevudi da nui, et lui à provochà il Turcho, et de ogni beneficio auto ne paga de una grande ingratitudine, et fo ordinà darli i sumarii di le nove da mar et la copia di questa scrittura.