[1148] El conte Zuam Francesco da Gambara 15
      El conte Alvixe Avogaro 15
      Misier Zuam Paulo Manfron 20
      Misier Tadio da la Motella 20
      Misier Alexandro Cojom 15
      El signor Filippo Albanese 15
      Misier Anzolo Francesco da Santo Anzolo 15
      El magnifico capitano di le fantarie 50
      El signor Zuam Griego 100
      El signor Sonzim Benzom 100
     
     
      [1499 08 27]A dì 27 avosto. In colegio. Fo el principe vestito con mantello di scarlato per coroto per la morte di sua neza da cha Nani noviza, et tutti di colegio si dolse a sua Signoria, la qual non lassò fioli.
     
      Dal Prodano, di sier Alvixe Marzelo capitano di le nave, date in nave a dì 6 avosto. Come non havia potuto scriver per esser stà su le volte, et che partì a dì 28 lujo da Sapientia nel qual zorno l'arma turchescha intrò in Portolongo e per do volte havia voluto ussir, ma vista la nostra non era ussita, lauda la nostra armata esser bastante a la turchescha et che quella mai si slargò da la ponta Furiana, et per do volte volse ussir et tornò, et che 'l capitano zeneral ha gran corazo, et il resto desiderio per esser la nostra più suficiente di la inimicha, et che eri si redusse lì al Prodano esso capitano con le galie grosse, et dice ozi saremo col zeneral in consulto di investir la ditta armata turchescha. Item, per uno gripo di Nepanto si ha il bassà di Grecia esser zonto de lì.
     
      Di campo, di sier Marchio Trivixan e sier Marco Antonio Morexini el cavalier provedadori zenerali, date ex felicibus castris a ponte Ojo a dì 25 a hore una di note. Come eri scrisse mandò l'Alviano con domino Vetor Martinengo a soraveder lo alozamento di là da Ojo, et fono a Coffi a li confini di Roman, qual loco era provisto de spingarde etc. et persuaso non aspetasse l'exercito nostro, el ditto loco si rese, e li promesse tratarli bene et observar li privilegii; poi andono a Antignano, Barbate, Pimenengo et Calze, et questi ultimi sono sora Ojo quali feno questo medemo per opera di ditto domino Vetor, et in Barbate messe 20 fanti di Zuam Mato per esser loco d'importantia.