Item, doman essi provedadori passerano Oio col campo, et haveano terminà alozar a Calze, ma passerà più oltra per alozar su quel di l'inimico, et che l'Alviano e il Martinengo andono etiam a Fontanelle dove è fanti 1400 et artilarie loco bon come Sonzin et nulla fezeno, ma queli habitanti tolse termine fino doman, [1149] tamen voleno haver un poco di guasto per mostrar etc. Item, esser venuti da essi provedadori alcuni di Antignano et altri lochi venuti a la devotion di la Signoria nostra a ricomandarse, li hanno dato bone parole et sono partiti ben contenti, e cussì farano a queli voluntari se darano, et li altri traterano mal. Item, mandono de' reporti, el sumario è notà qui sotto, uno vien da Milan et uno vien di Cremona, et che 'l capitano di le fantarie a uno provisionato havia tochà danari, con do contestabeli, lo ha fato apichar davanti el suo paviom per teror di altri provisionati acciò non fazino più, et fo di lhoro contento.
     
      Reporto di uno vien da Milan a dì 25, zonto in campo, qual partì eri hore 18. Dice come è nova qual vene eri a mezo zorno franzesi ebbe Tortona, la terra si dete e la rocha have a pati, vanno in Alexandria a campo dove è il signor Galeazo di Sanseverin. Item, il ducha vol far la massa contra franzesi, et che il signor Galeazo vien verso Pavia. Item, a Milan si dicea la Signoria era in acordo col ducha et in Milan si dava danari a' todeschi dove era 4 bandiere, il ducha stava in castello ha lassato la devotion di le Grazie. Item, 30 homeni d'arme di domino Francesco Triulzi havia scontrati in camino, andavano a Milan, et era stà chiamà misier Francesco Bernardin Visconte, qual etiam ha scontrato con cavali 30, menava con si uno prete di Caravazo ligato.