Item, in la Dieta di Meran hanno preso far 15 milia persone a spexe del paexe contra agnelini et la liga Grisa, dubitano non vengi a Meran et Bolzan, et tutti i lochi à mandato le robe a le forteze. Item, hanno preso tre sguizari quali hanno ditto la Signoria nostra li manda danari. Item, il ducha di Geler fa zente contra il re di romani qual li manda campo a l'incontro. Item, agnelini è ingrossati a Cuora per vegnir verso Meran, come à inteso per uno vien di Primier.
     
      Vene l'orator di Napoli, et disse come uno orator dil suo re apresso il re di romani mandava per haver certi danari a Milan con lettere di cambio, uno, qual a Roverè dal podestà nostro fono tolte, perhò pregava la Signoria li facesse render le lettere et li danari con lui havia adosso, et fo scritto ge le rendesse. Item, disse erano zonti qui do oratori dil re vano in Hungaria, voleno venir doman a la Signoria nostra, prega sia mandato zentilhomeni contra, sono alozati a l'hostaria; ditto si farà. Et cussì da poi disnar fo fato chiamar 4, sier Marco Lipomano el cavalier, sier Zuam Badoer el dotor, sier Anzolo Barozi et sier Alvixe Malipiero q. sier Stefano procurator, a la Signoria e ordinatoli doman li acompagnasse.
     
      Vene Placidio, qual è stato dal roy a Liom, disse soa majestà si racomandava al principe; quanto al romper si riportava a misier Zuam Jacomo, et prender di là di Po et venir a Piasenza, et passar Po et venir a Milan, et in questo interim le nostre zente fazi di qua qual cossa per potersi conzonzer. Item, che si meta hordine a le vituarie a Bergamo, et voria la Signoria tolesse il marchexe di Mantoa.