Ha ricevuto lettere, di 23, di rectori di Zara: li scriveno haver che Schander bassà fa zente in Bossina per corer in Dalmatia, over in Istria, voria le monition, come più volte à richiesto.
     
      Da Rimano, di Zorzi Franco secretario, di 27. Come Piero Mateo Ramusio doman si partiva de lì con 25 homini d'arme, poi veria il resto, et il signor con li cavalli lizieri et 25 provisionati auti de lì, qual ringratia la Signoria, aspeta solum alcuni ornamenti da Bologna, et vol venir a far riverentia al principe.
     
      Da Ravena, di sier Alvixe Venier podestà et capitano, di 26. Come havia espedito Meleagro da Forlì et datoli do page, vien in Friul; etiam domino Zuam Aldobrandino con li 93 a cavallo balestrieri, è partito per Friul, et à cargà le bombarde per Verona.
     
      [1172] Vene l'orator di Napoli: disse haver dal suo re, l'orator di soa majestà, andò al Turcho, esser zonto a la Valona, li scrive il Signor à abuto gran piacer di haver il corpo di Gem sultam suo fradelo. Item, à renovà la pace. Et che ditto Signor turcho à tre campi; uno in la Natolia, uno in la Romania et uno dove è la sua persona, et vien a' danni di la Signoria nostra, et à armada di velle 300; per tanto la majestà dil re suo li fa comunichar tal avisi. Apresso replichò fusseno scritte lettere a Roverè per haver quelle lettere intercepte di l'orator suo, le qual fono mandate qui per el podestà. Or el principe li rispose haver auto per altra via il tutto, et di la pace sapea per avanti; quanto a l'armada dil Turcho la nostra li era si propinqua al presente et si grande che presto sperava in Dio si sentiria bone novele per cristiani.