Noto. Messeno provedador in Caravazo, sier Zuam Antonio Dandolo fo di sier Francesco, zenero di sier [1185] Marchio Trivixan provedador se ritrovava con lui, et in la rocha fu posto sier Vicenzo Zorzi q. sier Polo di Santa Marina, era etiam lui in campo; il castelan duchescho era nominato domino ...
     
      Da Bergamo, di rectori, di 30 avosto. Haver, per uno vien di Milan, che francesi haveano abuto Alexandria di la Paja et à amazati tutti vi era dentro, et che quelli di Milan à mandati di fuora a chiamar li soi homeni di le ville vengino in la terra a custodia di le caxe. Item, che hanno per via dil comissario di val San Martin: come il ducha di Milan à mandato dir a' sguizari, è contento darli vituarie, et quelli à risposto non se incurar, et li mandò etiam a dimandar ajuto; risposeno ditti sguizari non voler esser contra la majestà dil re di Franza et la illustrissima Signoria di Venecia; et questa lettera fo letta a l'orator francese in collegio, qual venuto fuora lo disse publice a tutti.
     
      Da poi disnar fo gran consejo, et fu posto, per li consejeri et cai di XL, una parte che li debitori di l'oficio di le raxon nove che haveano gracia di pagar di tanti pro de imprestiti, che erano passati li tempi, dovesseno depositar tanto pegno quanto valeno li pro in l'oficio, aliter sieno privi di le gracie etc. Ave 3 non sincere, 349 di no, 1040 de sì, et fo presa.
     
      Et io Marin Sanudo savio ai ordeni andai di hordine dil collegio a li forni a veder certi biscoti si mandava in armada, quali per opinion di sier Anzolo Trivixan, et sier Zacharia Dolfin provedadori sora le cosse da mar fono fati discargar dicendo erano cativi, dil meran di Zuam dal Cortivo et di quel di Stefano Schiavo, per li qual navilii se manda in armada stera 7000; et sier Jacomo da Canal et sier Jacomo Gussoni provedadori a le biave diceano esser boni biscoti et oculata fide visto fo terminato d'acordo esser boni; et vidi li forni, Jacomo Bertoldo capo, sono numero 32 fanno stera 40 al zorno, tamen etiam se ne fa far a Padoa et a Trevixo et etiam per li forni in la terra.