Ancora fo mandato da qui do bombardieri in campo in Geradada, et expediti certi contestabeli vano per tuor i provisionati fati per le terre e condurli in campo.
     
      Intrò li cai dil consejo di X credo in do materie: in una dil marchexe di Mantoa perché Antonio di Ruberti e Donato di Preti erano qui per il marchexe preditto solicitava con lettere, et in l'altra intisi era praticha in Lodi di darse a la Signoria nostra, et voleano levar San Marcho, ma è contra li capitoli, perhò, etc.
     
      Da poi disnar, fo pregadi. Et per sier Hironimo Capello provedador, stato con auctorità di avogador per le camere, et questo per menar sier Francesco Corner fo di sier Zuane fo camerlengo a Padoa, era in prexon retenudo per ditto consejo di pregadi; el qual reduto, la Signoria vene [1192] suso dolendosi dil prefato sier Hironimo Capello qual non li havea dato termine: per tanto voleva termine da consegnarsi con li avochati; et sier Hironimo Capello parlò davanti la Signoria contra altamente; tandem fo terminato darli tutta questa setimana di termine e luni poi darli il consejo, et cussì fu posto la parte dar il ditto consejo ut supra.
     
      Da Roverè, di sier Nicolò da cha da Pexaro podestà, di 30 avosto. Come Hironimo da Mozam partì da Trento con 300 provisionati alemani, la più parte schiopetieri, va a Milan, et che luni fo 26 zonse a Trento misier Jorio di Petraplana qual have danari et lettere da Milan, le qual lete le have le brusoe: si dice va capitano di alemani 1500 in favor dil ducha di Milan, et par Anzolo da Fiorenza era a Trento per mandar zente verso Milan, e lì si facea description di zente, et vanno queste zente per val Martello, Item, che in Agnelina erano zonte 14 bandiere dei sguizari, et che certo si farà la pace dil re di romani con ditti sguizari a requisition dil ducha di Milan per poterlo venir ad ajutar o mandarli zente.