Mandono una lettera li scrive sier Francesco Stela vicario di Pontevicho, di do, avisa esser zonto lì un cittadin da Cremona, et lo nomina, li à ditto quella terra esser in arme, cridano: Marco, Marco, à mandà fuori i ducheschi, il luogotenente et comissario soli è restati in palazo serati, ditto cittadin va ai provedadori in campo. Item, si ha la partita dil ducha di Milan, et misier Zuam Jacomo haver auto Piasenza, Parma, Pavia et esser intrato in Milan.
     
      Da Padoa, di ozi. Come era zonto lì Piero Pessina contestabele con provisionati 100, catati de lì, va a Roverè justa i mandati.
     
      Da poi disnar, fo pregadi. Et poi letto le lettere, [1196] el principe si levò, et cavossi la bareta di testa ringraciando el nostro Signor Dio di le bone nuove haveamo, confortò tutti far justizia. Poi referì quello havia exposto domino Zorzi Hellecher orator cesareo, et come li savii havia consultato scorer a resposta.
     
      Posto, per tutti li savii, scriver al capitano zeneral et provedador di l'armada, laudandoli, et come stemo con desiderio saper l'exito, li avisamo le nove felice di Lombardia, et li mandamo li sumarii, ordinandoli debbi far festa; siché provegni questa noticia al Turcho, et cussì sia scritto in Dalmatia, Albania, Corphù et Puja fazino leticia. Have niuna non sincere, una di no, 209 de sì.
     
      Posto, per lhoro savii, di scriver a l'orator nostro in Franza si debi alegrar nostro nomine a la majestà dil re di la comune victoria, et dirli per esser andato il signor Lodovico al re di romani dubitano non fazi qualche movesta, per tanto saria bon ajutasse sguizari contra ditto re.