Have uno di no, 209 di la parte, come la prima.
     
      Posto per li preditti rifermar a' stipendii nostri per do anni fermi et uno di rispetto il signor Astor di Manfredi di Faenza con li modi et capitoli havia prima. Have tutto el consejo et fo presa.
     
      Posto, per tutti li savii, dar licentia a una nave nolizada per li fioli di sier Antonio Grimani procurator, capitano zeneral, andasse a Bari a levar marchadantie de li ditti, poi si apresenti al zeneral, et sier Beneto Zustignam savio a terra ferma, io Marin Sanudo et sier Zuam Trivixam savii ai ordeni volemo la parte con questo sia dato licentia etiam a la nave di sier Francesco Foscari va in Candia, et al meran di Donadi va etiam in Candia, et il resto di savii messeno dar licentia a tutte nave, et navilii retenuti, con questo si apresenti al zeneral. Et primo contradixe sier Piero da cha da Pexaro cassier non era tempo di dar licentia, unde io li risposi era da compiacer il capitano zeneral atento le sue robe stava a Bari con pericolo, et sier Alvixe da cha da Pexaro cao di XL, sier Zuam Trivixan et sier Zuam Moro savii ai ordeni messeno de indusiar, et io solo misi fusse dà licentia a quella di Grimani solum. Andò le parte, niuna non sincera, nulla di no, la mia 84, di indusiar 101.
     
      Fo letto una gratia di sier Piero Zane è debitor a le raxon nuove di dacii pagar in anni 10 di tanti pro etc. Li consejeri non volseno meter fosse risposo, ergo etc.
     
      Da Rimano, di sier Zorzi Francho secretario, di primo. Come quelle zente per causa di le aque [1197] non erano levate, ma che omnino doman si leveriano, siché è bon sarà a Codignola.