Augustinus Barbadico dei gratia dux Venetiarum etc. nobilibus et sapientibus viris Paulo Trivixano equiti de suo mandato potestati et Johanni [1208] Francisco Pasqualico doctori et equiti capitaneo Brixiae fidelibus dilectis salutem et dilectionis affectum. Venerabilis vicarius rev. inquisitoris ordinis praedicatorum significavit nobis suis literis quod cum superioribus diebus vobis consignasset et tradidisset foro vestro quosdam presbyteros confessos et cum omni solemnitate condemnatos pro haereticis ad mortem, ipsi presbyteri impetrare fecerunt in curia duos judices, videlicet quemdam dominum Antonium Cavatiam archipresbyterum et dominum Apolonium sacristam homines inhabiles tanto judicio, et non omni exceptione majores ut eorum medio justitia conculcetur, et impune evadetur a dictis, et erroribus eorum id certe displicuit nobis magnopere, quibus praecipua cura est persequi hereticae pravitatis sectatores volumus itaque et vobis mandamus ut e vestigio accersitis dictis duobus judicibus debeatis nostro nomine illis praecipere verbis efficacibus quod non audeant nec praesument se impedire in hujus negotio pro quanto caram habeant gratiam nostram, usquequo aliter ordinabimus; interim vero presbyteros illos nephandissimos condemnatos diligentissime in carceribus et compedibus ferreis servari facite, et de hoc date notitiam super scripto vicario inquisitoris, subjungendo ei quod parati sumus scribere etiam in curiam ad oratorem nostrum in hac materia, quotiens voluerit illos mittere ad obviandum supterfugiis suprascriptis.