Et che sabado si adunò molti citadini in uno et feno 4 capi, zoè l'episcopo di Como Triulzi, el zeneral di Landriano, l'arziepiscopo di Bari di Castiglione, et misier Francesco Bernardin Visconte. Item, la domenega si redusseno molti cittadini in locho de la Roxa dove si solea predichar, et deliberò dar auctorità a questi quatro, et elexeno altri 9 cittadini quali havesse il governo di Milan. Questi feno far una crida per nome dil signor Lodovico, et fu a tutti chi voleva, potesse portar vin, formento et altre cosse da viver senza pagar alcuna angaria, over gabella in Milan. Item, che 'l signor Lodovico ha ordinato a quelli dil castello fazi la terra quello voja mai essi ofendi la terra con alcuna artilaria. Item, el ducha partì il luni, a dì 2 a hore 11, andava verso Como acompagnato dal signor Galeazo, et il castello è rimasto ben custodito de fanti, et nel zardin sono le zente d'arme, zoè 500 homeni d'arme alozati et certi cavalli lizieri. Et prima si partisse ditto signor Lodovico donò a misier Francesco Bernardin Visconte una sua possession chiamata la Sforzescha, dà de intrada lire undexe milia. Item, domenega era nova misier Zuam Jacomo Triulzi era a la volta di Lomelina, et che Pavia si potea meter per spazata, et il Triulzi era desiderato dal populo di Milan, qual non vol intrar si non d'acordo de tutti. Item, che il thesorier di Landriano, che il venere fo ferito il sabado a hore 19 morite, et saria etiam stà amazato misier Ambrosio da Corte si non se tirava in una porta et scapolò, et introno in la soa caxa per sachizarla, et se ditto misier Francesco Bernardin non se li opponeva era sachizata, qual socorse et fè star in drio.