Da Bergamo, di rectori, di 4. Come per uno prete, partì eri da Milan, si ha: a dì 28 il ducha chiamò li cittadini a uno consejo digando lo ajutasseno, et misier Francesco Bernardin Visconte parlò: signor non si pol, più havete 4 lupi à manzà il cuor de tutti, unde el signor mandò, a dì 29, Ascanio con li fioli via, et lui si partì, poi lassò ben in hordine el castello, et in Milan si crida Triulzi et libertà. Item, che l'episcopo di Como stava a Sant'Antonio, et lì se fa consejo. Item, che Milan non vol aceptar francesi dentro, nì misier Zuam Jacomo, ma li à mandato a dir vadi assediar il castello che la terra li darà vituarie, et volendo intrar in la terra entri lui solo con 200 italiani, et che il fiol di misier Zuam Jacomo è in Milan.
     
      Di sier Sebastian Moro patron di la barza, a dì 23 avosto sora Otranto. Come andava verso Modon a trovar il capitano zeneral, et che al Sasno trovò il nostro capitano di le fuste.
     
      Di Otranto, di sier Piero Nani governador, di 24. Eri zonse lì sier Agustin Malipiero capitano di le fuste con tre fuste: li à ditto al Sasno haver sentido da alcuni calogieri a la Valona esser 7 fuste et uno bregantin, et esser zà una fusta butà in aqua. Item, have lettere dil governador di Brandizo, li scrive ordeni a ditto capitano vadi subito lì per cosa importante, et cussì dete le lettere a esso capitano qual si parte et va a Brandizo. Item, par a Leze sia zonto do squadre di zente dil re, et ne aspeta di le [1219] altre, et 200 cavalli lizieri. Item, di l'armata nostra da' 6 dil mexe in qua nulla si ha.