Item, vi è assà munition, et eri sera si comenzò serar le porte per non aprirle più nì lassar ussir niun. Item, tre caxe governa Milan: Visconte, Triulzi e Boromea; e il cavalier fo fiol di misier Zuam Boromeo ha fato provisionati, et hanno fato cride in nome di lhoro 12 deputati al governo, non li dice quali sono, ma misier Francesco Bernardin Visconte è il capo, et che non si dariano a Franza si havesse speranza di socorso, ma zercha acordar le cosse lhoro col Triulzi el popolo e cittadini voriano il Pulim per signor, zercha no star in libertà e vol dar socorso al castelan di Sonzin e al castello di Cremona. Item, misier Zuam Jacomo non è ancora intrato, vol intrar con parte di la zente e con reputation e d'acordo con milanesi, e ozi il campo dovea passar e venir nel zardin.
     
      Del ditto, di 4. Avisa, per uno balestrier a cavalo venuto lì, ha inteso che Bernardin da Lignago contestabele in Rivolta Secha passò Adda a Melzo et ha corso a queli lochi, et che il conte de Mixocho fiol di misier Zuam Jacomo è a Milan, à ditto la Signoria ha roto i pati al re, non haverà Cremona imo vol recuperar quello nostri ha tolto, siché queste voci è sparse che misier Zuam Jacomo vuol tuor Cremona o per il roy o per lui come capitano di ventura; et esso podestà subito mandoe ditto balestrier cussì spogliato da li provedadori in campo, dice ditto Bernardin lo spogliò. Item, scrivendo questa, è venuto uno a dirli haver visto andar zoso cinque burchi cargi de fanti, non sa si vadino a Cremona overo a Pizegeton per socorso.