Nara tutti li sucessi, e il re de' romani esser acordà con sguizari e altre cosse, qual parse al principe non le lezer si non con li cai di X. Et consultato tal lettere d'importantia, li savii consultono scriver [1224] a li proveditori in campo, strenza Cremona non si dagando voluntaria, et a li capetanii di le terre nostre vicine, videlicet Brexa, Bergamo debino inmediate con gran numero di zente andar in campo, perhò che dubitavano non seguisse etc. Et cussì la matina in collegio con la Signoria fo expedite le dicte letere, d'acordo, et risposto a Zuam Dolze secretario secrete.
     
     
      [1499 09 07]A dì 7 septembrio. In camera dil principe si redusse tutto il collegio, cussì come venivano, et in la terra era gran tumulto per esser venuto questa note uno gripo da Corphù con lettere di quel rezimento molto brieve di 27 avosto, scriveva mandar lettere dil zeneral, tamen non era lettera alcuna dil zeneral che parse di novo a tutti, et scrivea haver etiam expedito lettere per via di terra, le qual non erano ancor zonte, et dicono al patron dil gripo sia da' ducati 22, per sua fadiga, nome Nicolò Graropolo da Corphù, al qual subito li fo dati. Et sier Vicenzo Grimani fiol dil capitano zeneral era lì, e trovò una lettera di prè Hironimo Cesoto capelan di suo padre, li scrivea di novo di 21 sora il Zante, nara li successi zorno per zorno di 6 avosto fin quel dì, la copia di la qual sarà qui soto posta, et questa fo leta poi in collegio. Item, fo leto una lettera di sier Anzolo Guoro de sier Hironimo, è nobele col provedador Guoro in armada, molto copiosa drizata a suo padre, era tunc cao di XL, e una di sier Domenego Malipiero provedador di l'armada drizata a sier Fantim suo fratello, etiam copiosa; et vidi io una di sier Zuam Nadal nobele su la galia dil zeneral scrita a suo barba sier Nadal Nadal, siché quasi tutti havia lettere da li soi, ma la Signoria non haveva lettere dil zeneral, che stavamo molto di mala voja, si per le cative nove, vene dil brusar di le do nostre nave come del disordine seguito etc.