Copia di uno capitolo di una letterascritta da Famogosta a sier Andrea Venier
      de 25 zugno.
     
      Hozi è venuto uno gripo, partì domenega da Tripoli, da novo dice el diodar era nel paexe de Alepo, da poi entrato in Alepo è stà atosegato et è morto, et vedendose atosegato fece apichar tutti li soi servidori, el suo comesso era a Tripoli è stà prexo e messo in cadene; el signor ultimamente cazado se aspetava de zorno in zorno, el diodar grando che amazò el soldam zovene, è rebelato al soldam, è venuto sul paexe de Gazara, et con lui è armiragij et schiavi assai, vedo de ogni banda ruina in quel paexe.
     
     
      Copia di una lettera dil magnifico capitano dil regno,
      scrita a li rectori de Nischia, a dì 27 zugno.
     
      Da novo de qui, eri per una barcha, partì terzo zorno fa da Tripoli, dice esser morto il diodar vechio, et Aliduli che saria, faria causa che 'l paese se aquieteria, altro da conto non dice.
     
      Da Famagosta, di sier Bortolo Minio capitanio a la Signoria nostra di 16 lujo. Nara molte cosse, et bone provision fate in quella terra, à fato gran muraje, posto formenti e biscoti in la terra, et ha recevuto nostre lettere in sua laude, ringratia la Signoria.
     
      Di Candia, di sier Bernardo Zustignam capitano, vice ducha e consejeri di ultimo lujo et di 7 avosto. Come era zonto lì uno messo da Rhodi, andava al zeneral. Item, esso rezimento mandò sier [1227] Alvixe Malipiero fo viceconsolo a Rhodi a dimandar ajuto a quel gran maistro di armata. Item, di certi navilii e nave de biscoti venuti di Cypro, le à mandà in armada, et una nave con bandizati abuti di quella isola numero 60 à mandà al zeneral.