A dì 9 ditto a hore 9 de dì. Vene da Veniexia uno barzoto de i Memi armado con provisionati 150 e una marziliana patron Zaneto da Muran per Candia con 9 homeni, per la qual se ebbe una lettera de dì 23 lujo del magnifico misier Marcho Foscolo in recomandation de ditta caravela, a qual porete far intender per lo grande amor sempre ha portato e porta la magnificencia di misier a sua magnificencia e tutta caxa sua, tanto quanto per ditta lettera sua magnificencia rechiedeva meritamente sine mora fu exequito, e tanto più per lo imenso amor la magnificencia di misier porta al magnifico misier Marin da Leze qual richiese lo simile, et è amato come fiol e zeneralmente da tutta l'armata, per le degne parte regna in soa magnificencia.
      A dì ditto se hebe lettere dal magnifico rezimento de Corphù de dì 4 ditto. Come la magnificencia di misier Andrea Loredan havea deliberato di andar a Lepanto con provisionati et 11 gripi armati.
      A dì ditto, a hore do di note. Zonse misier Alvixe Orio sopracomito, per el qual se hebbe una lettera di misier Donado Marzelo de dì 21 lujo gratissima a la magnificentia di misier, al qual da parte soa ringraciarete.
      A dì 10 ditto a hore meza de dì. L'armada turchescha ussì, ma fu a fine che nui se levasemo, et ponessimo in mare et lhoro venir al nostro locho, et fense di far lo ritorno.
      A dì ditto, a sol a monte. Azonse do barze biscaine veniva di Rhodi, et fu quelle che ne l'andar a Rhodi e Modom promise a la magnificentia di misier per la bona compagnia dolze parole, et promese che non andando l'armata turchescha a Rhodi veniriano in nostro ajuto insieme con altre, le qual barze sono di bote 300 in 350 con homeni 100 per una, et oltra 130 provisionati valenti homeni et ben in hordine, acordade in questo modo per lo reverendissimo gran maistro di Rhodi a nome di la nostra illustrissima Signoria, zoè per cadauna barza con li soi homeni ducati 550 al mexe principiando [1232] el mese al suo partir da Rhodi che fo a dì 11 lujo in super, li 130 provisionadi do capi, uno de ducati 15 l'altro 6 al mexe, el resto ducati tre principiando el primo dì de avosto, di che la magnificentia di misier li aceptò et carezoli.