A mi non sta parlar né dir in alto, ma pur dirò questo a hora non esser tempo da poner a tanta impresa zoveni et non homeni.
      A dì ditto. In sera zonzessemo in uno locho di aqua.
      A dì 15 ditto. Tre hore avanti di se levassemo, a hore 4 de dì asonzessemo a la fiumera apresso el Zante.
      A dì ditto, a hore 5 de dì. Per lettere di Lepanto, de dì 14, se à inteso come el campo dil Turcho si era presentà a Lepanto, tamen non havea principià a dar bataglia, vero è fazevano coraria. Io existimo che da terra non li potrà tropo nuoser non havendo bombarde et altre artelarie da combater, le quale erano sopra l'armata, et dico erano poche, per mia fè ne sono poche, che le do nave ch'è carge eran insiem con do schierazi grandi fono persi, et pur hessendo remasti sono pochi, nil minus per esser da temere tanta potentia cagnescha al meglio che si pol, de fato la magnificentia di misier, che mai non dorme, insieme con li magnifici provedadori, atrovandosi nescio quo modo su l'armata nostra el magnifico misier Zuam Francesco Venier Villamarin, el dicto misier Zuam Francesco hanno costituido et creado provedador zeneral de Lepanto, dandoli dicta terra et l'impresa in le sue mano, dandoli 300 provisionati, 100 et più barili di polvere, 4 galie sotil, zoè mesier Polo Nani, misier Marin da Leze, il Sibinzam vechio et il Fumati zaratino, et 4 gripi armadi, di qual legni ditto misier Zuam Francesco habi a disponer segondo le occorentie.
      Insuper, perché di sopra ho facto mencione che de le nave nostre brusate non era scampato alcuno, in sto dì che l'armata nostra insieme è adunata, exeptuando le nave fin ad hora et qualche galia grossa, se ha presentà et visti zercha 30 homeni che erano scapolati, et tiense esser scapolà etiam de li altri, che Idio cussì permeta.