Da Caravazo, di sier Zuam Antonio Dandolo provedador, di 6. Come misier Jacomo Secho havia abuto da Milan el nome di 12 electi al governo, quali sarano qui sotto scripti, et come che lui li scriveva si partiva a hora per andar da misier Zuam Jacomo a capitolar. Item, per uno altro venuto da Milan partì ozi a hore 16, ha nova misier Zuam Jacomo esser intrato in la terra con monsignor di Lignì et 200 cavali italiani, et che queli di castello bombardava la piaza, adeo niun vi potea comparer; e che misier Zuam Jacomo ha mandato misier Nicolò Chiozo a dir a queli sono in castello si rendano, quali hanno tolto termine sin luni a dì 9 di rendersi non li venendo socorso. Item, esser stati a Milan li oratori cremonesi e sono stati licentiati e sono ritornati a driedo; e ha inteso, in caxa di misier Francesco Bernardin Visconte, come el signor Lodovico era stà preso in Valtelina e il conte di Mixocho li era andato con cavali 4000.
     
      [1256]Questi sono li 12 deputati al governo di Milan.
     
      El reverendissimo domino archiepiscopo di Bari.
      El reverendissimo domino prothonotario di San Celso.
      El reverendissimo domino prothonotario di Birago.
      El magnifico domino Baptista Visconte.
      El magnifico domino Ambruoso dal Mayno.
      El magnifico domino Zuam Francesco de Marliano.
      El magnifico domino Erasmo Triulzi.
      El magnifico domino Scipio Barbavara.
      El magnifico domino Alvixe de Galarà.
      El magnifico domino Nicola Arciboldo.
      El magnifico Zuam Andrea Cagnola.
      El magnifico domino Hironimo de Carcano.
     
      Da Brexa, di rectori, di 7. Avisano etiam lhoro la nova di esser stà preso il ducha di Milan, la qual hanno inteso per più vie e mandono alcuni avisi di Jacomo da Gavardo li scriveno di Valchamonica, et dil capitan Zuam di Bulgari: insumma todeschi quasi ritornavano in driedo.