Da Lion, di l'orator nostro, di 5. Come à lettere, inteso il roy il prender di Parma, Piasenza et Pavia et la fuga dil signor Lodovico, et misier Zuam Jacomo fin do zorni dovea intrar in Milan, havia deliberato doman, ch'era a dì 6, partirsi di Lion per venir a Milan, et lui orator era stato quella mattina a cavallo a messa con soa majestà cavalcandoli apresso, et si alegrò assai di le victorie, disse oferimo l'exercito nostro in ajuto de la illustrissima Signoria, et acadendo torà le bombarde nuove, grosse per bombardar il castello di Milan, et aricordò fusse fato procession; et cussì soa majestà havia ordinà per tutte le sue terre fossino fate; et l'orator li disse, vede la majestà vostra l'illustrissima Signoria non obstante habi l'armada dil Turcho a l'incontro potentissima, pur à voluto far quanto era ubligata: et cussì il re confirmò. Item, el conte di Cajazo par sia venuto lì per oferir Zenoa al re; et li oratori di soa majestà al re di romani mandati per l'acordo de' sguizari a dì 4 doveano esser insieme, et sguizari par non siano renitenti. Item, è venuti a la corte li oratori dil ducha di Lorena, il roy si parte, va a Garnopoli poi a Genevra.
     
      Da Brexa, di rectori. Di certo aviso auto: come el ducha de Milan fo a Tyram con tre cardinali, videlicet Ascanio, Sanseverin et Ferrara, et un episcopo, el marchexe Hermes, misier Galeazo di Sanseverin, misier Alexandro Sforza, el conte di Melze suo fradelo et domino Marco da Martinengo con 200 stratioti et 50 balestrieri a cavallo, il resto di le zente havia l'hano abandonato per non haver danari.