[1280] Et venuto a l'audientia, et sentato, perhò che fo levata la sedia del principe, et publice presentò le lettere et la bolla di credenza, poi disse el summo pontefice havia mandato lui suo afine legato a questa Signoria per dimostrar tanto più l'amor la ne portava, poi parlò di queste perturbation turchesche etc. Demun, mandati tutti fuora chi non intrava nel consejo di X, introe in su la materia, la qual al loco suo di sotto scriverò; et poi iterum el principe col collegio lo acompagnò a meza la piaza.
     
      Da poi disnar, fo gran consejo. Et venute lettere di campo di provedadori sier Marco Trivixan e sier Marco Antonio Morexini el cavalier, date in Cremona a dì 10 hore una di note, parse a la Signoria fusse leta a gran consejo et cussì fo leta. Avisano come quel zorno a hore 22 erano intrati con gran jubilo in la terra sonando trombe et campane, videlicet lo illustre governador, l'orator di la cristianissima majestà, essi provedadori et li condutieri; li veneno contra el sufraganeo dil cardinal Ascanio ch'è episcopo de lì con le croxe avanti aparato col clero, et li cittadini con una umbrella portada da 6 cittadini principali, tra li qual domino Leonardo Bota sotto la qual era il governador, l'orator et lhoro provedadori, et cussì introno in la terra, et smontati al domo, facta l'oration, lo episcopo preditto disse certe parole bonis auspicis, pregandoli in signum letitiae fusse fato lì in domo una capella di San Marco e San Nicola che ozi è il suo zorno; et poi andati in palazo, dove erano molti cittadini, essi provedadori usono qualche parola dil bon animo ha la Signoria nostra verso di lhoro, et poi butono le tessere chi dovea restar lì per governador e tochò a esso sier Marco Antonio Morexini et cussì restava, et il Trivixam andò in campo.