Sier Francesco Michiel de sier Antonio.
      Sier Polo Calbo q. sier Marin.
      Sier Zusto Guoro q. sier Pandolfo.
      Sier Jacomo Corner q. sier Donado.
      Sier Liom da Molin q. sier Nicolò.
      Sier Trojam Bolani q. sier Hironimo.
      Sier Zuam Morexini q. sier Orsato.
      Sier Andrea Baxadona capitano in Barbaria.
     
      Et presa tal parte, atento tutto el consejo voleva sier Thomà Zen el cavalier fusse provado per farlo capitano di le galie grosse, atento il suo gran cuor e praticha di mar, e utinam fusse stà lassato provar capitano di le nave perhò che per pocha cossa non si pol provar se prima non restituiva certi danari quando fo provedador a Pisa: or fo chiamato el consejo di X in cheba, et statim fu preso el ditto sier Thomà Zen si podesse provar, et fu ben fatto etc.
     
      Fu messo, per li savi dil consejo e di terra ferma, atento la regia majestà veniva a Milan fosseno electi de presenti do oratori a soa majestà quali vadino insieme con sier Marco Zorzi et sier Beneto Trivixan el cavalier zà destinati a sua majestà vadino con cavali 25 per uno et con quella comission li sarà dà per questo consejo. Have tutto il consejo.
     
      Di campo vene lettere di sier Marchio Trivixan provedador zeneral, date a San Martin a dì 12 hore 9 di note. Come il castelan di Cremona era d'acordo col provedador Morexini, come li ha ditto el signor Bortolo d'Alviano, nel qual era boche 40 di artilarie et che havia abuto certi avisi di Brexa di todeschi, unde esso col governador sono stà contenti lassar Lazaro Grasso con i balestrieri a cavalo acciò vadi a Valchamonica.