Item, è capità lì molti fanti, non li ha voluto dar danari per sparagnarli non vedendo el bisogno, et etiam el pagador dice non ne haver più. Et in la rocha de Sonzin ha posto a custodia sier Francesco Contarini de sier Alvixe, et che la rocha de Pizegeton era di sito fortissima e assà artilarie havia; et manchava haver el salvoconduto per quel castelan di misier Zuam Jacomo Triulzi, qual di hora in hora aspectava. Item, manda la lista di le zente d'arme sono in campo con la mostra, et una lettera [1298] li scrive Zuam Dolze di 11 da Milan, et alcuni reporti di do venuti, sta lì con Ludovico.
     
      Reporto di sier Sigismondo de Vicomerchà qual a dì 11 partì da misier Zuam Jacomo che era a Milan et mandò a dir a Como retenisse il signor Lodovico e uno prete era lì presso ditto misier Zuam Jacomo, unde quelli di Como, zoè esso signor Ludovico, fè una crida fusse lassato andar libero, et conzò con danari le cosse e montò in una barcha e passato per Valtelina queli voleano da lui ducati 34 milia tolti con le taje imposte, li convene exborsar con questo l'acompagnaseno fuori di ditta valle. Item, par ditto prete era in Como sia stà preso et conduto a Milan, et che Milan si ha dato al re di Franza, è stà posto in castello fanti 4000 in caxa di misier Marchexin Stanga, et nel brueto altri fanti 4000, le zente d'arme alozato atorno la terra, e il re si aspetta a Milan; et che 'l conte di Cajazo e Antonio Maria di Sanseverino sono con misier Zuam Jacomo.
     
      Reporto di Zuam di Soresina stato sotto Marzocho contestabele e col signor Ludovico, qual havia 50 provisionati sotto di lui Marzocho balestrieri a cavalo 100; et a dì 7 a Sondrio, mia 20 di là dil lago di Como, esso Zuane si partì con li altri provisionati e ne restò 10, va verso Basilea, era con lui il cardinal di Ferrara, Marchexin Stanga et alcuni altri.