Item, esser zente redute in Valtelina, dubita sarà asaltato. Et in el reporto di Sigismondo sopraditto par il signor Ludovico andò per il lago di Como fin a la torre di Gogna dove dismontò e fè sfondrar la nave acciò niun vi venisse driedo.
     
      Da Cremona di sier Marco Antonio Morexini el cavalier provedador, di 12, do lettere. Come in quella matina hessendo levato di caxa con molti cittadini andò in la chiesia cathedral dove el sufraganeo vicario dil cardinal Ascanio cantò una messa solenne, poi sentò esso provedador a l'altar e fo dato il juramento a tutti li cittadini dil consejo su uno messal, quali fono tolti in nota, et li populi voriano pur quel dacio de' menuti fosse levato et di fostagni potesseno per tutte le terre nostre senza dacio portarli; lui provedador usò al populo bone parole, tamen ne è di guelfi e gibelini e maltraversi e dubita di novità perché erano quasi reduti per sachizar le caxe de li ambasadori, e misier Lunardo Botta eri vene da lui a dirli dubitava di la sua persona e stete in palazo con esso provedador. Item, quel zorno haveano fato consejo et electi 12 cittadini per oratori a la Signoria nostra, tre cavalieri, tre doctori, tre cittadini e tre merchadanti.
     
      Del ditto, pur di 12. Come domino Bataja castelan [1299] era pur duro, et il conte Alvixe Avogaro si havia operato assai, unde ditto castelan mandò a parlar a esso provedador uno Francesco di Quartari, fo mandato lì per il ducha di Milan quando nostri passò Ojo, et reduti solo col provedador in una chiesia portò li capitoli non però molto discrepanti di li primi ma disformi, et vol ducati 25 milia, e dittoli non si voleva dar tanti danari, tornò in castello e ritornò fuori dicendo queste era la sua ultima resolution, et haver zorni 9 di tempo da poter mandar a dir al signor Lodovico lo socori, tamen si venisse tutta Alemagna zoso si daria a la Signoria.