Da Ravena, di sier Alvixe Venier podestà et capitano, di 15. Come ha ricevuto il nostro ordine si lievi con le zente di l'impresa di Codignola, cussì subito fece; e ha ditto al signor di Rimano e altri condutieri vadino in campo dove erano deputati andar prima, quali voriano danari, ergo etc.
     
      Da Gradischa, di sier Andrea Zanchani provedador zeneral in la patria, di 14. Come havea ricevuto una lettera da madona Dorathea contessa di Corbavia, de 11: avisa turchi è per venir in Friul et scrive farà segni e questo perché martalossi vien fuora a far danno, tamen ha mandato a inquerir et aviserà la verità. Conclude esso orator non vi esser fanti lì, e voria di campo di Lombardia se li mandasse fin 1000 fanti.
     
     
      [1499 09 18]A dì 18 setembrio. In collegio fu lecto prima quello eri Piero di Medici havia ditto a Bernardin di Ambroxi secretario nostro, mandato a saper quello chiedeva, et messe in scriptura uno longo discorso, concludendo al presente a la Signoria di Fiorenza voria provar etc. Et niun di collegio non li parse, atento eramo ussiti di guerra con fiorentini, che non si potea vadagnar a voler di novo intrar.
     
      Fo facto di novo il scrutinio de li governadori di le galie grosse, et questo perché fo terminato per la Signoria quello fatto eri andasse zoso, atento erano rimasti homeni non stati capitani soracomiti etc. come vuol la parte; et ditto scurtinio sarà qui sotto notado. Aduncha rimase sier Sabastian Contarini fo capitano al trafego, sier Marco Orio electo capitano in Fiandra, sier Carlo Valier rimase sopracomito, sier Francesco Valier fo capitano a Baruto, sier Pollo Valaresso fo patron di la barza, sier Nicolò Pasqualigo fo ai X oficii, sier Silvestro Valier rimasto sopracomito, sier Zorzi Viaro fo di pregadi, sier Andrea Foscolo rimasto capitanio in Acque morte, sier Antonio Querini fo capitanio al trafego, sier Pangrati Zustignan fo patron di nave di comun, [1320] Alvixe di Prioli fo capitanio in Alexandria, et sier Tomà Contarini electo sopracomito, sier Piero Sagredo fo capitanio al trafego, et sier Alvixe Zorzi va capitanio in Alexandria.