Veneno 4 homini di Fontanelle a inchinarsi a la Signoria nostra, fono li primi di Geradada veneno di voluntà sotto la Signoria nostra. Et venuti in collegio, presentò la confirmation di certi soi capitoli concessi per li provedadori nostri. Li fo dato bone parole, et erano venuti sotto una Signoria che li faria bona compagnia, et li tochò la man, et li capitoli si vederia.
     
      Vene li do oratori luchesi, ben vestiti, et mostrò lettere dil Lucha di 11, li advisava come el campo de' fiorentini si levò di Pisa, et andò a San Piero in ... et Pisani ussiteno de la città, et li fa qualche danno ne le coraze, et hanno mandato l'artilarie a Livorno, et hora mai se ne anderano le zente a le stanzie a Vico et Cassino. Item, hanno un aricordo auto per Bortolo Cenomi, citadin luchese venuto da Liom partì a dì 7, avisa molte cosse, zoè che a dì 5 fiorentini si chiarino con il re voler esser, et dimandavano li facesse rehaver Pietra Santa tenuta per essi luchesi, et il re non à risposto a questo, ma à rimesso a risponderli quando sarà in Italia; et che monsignor di Bajus et monsignor di Andrages fono dati auditori a li oratori luchesi quali sono Nicolò Cenomi et Bortolo Datti, et par che cardinal Roam li sia contra: per tanto suplicavano la Signoria volesse dir a l'orator de' fiorentini qual cossa, come luchesi sono sotto la protetion nostra, et si scrivi a misier Zuam Jacomo Triulzi et al cristianissimo re in soa racomandatione. Li fo risposto per il principe bona verba, luchesi sono nostri, et si faria ogni recomandation, et disse prima consultato con il collegio la risposta.