Relation di Mella Romanengo cremonese fiol di Antonel secilian venuto di Alemannia, fata al podestà di Roverè. Come a dì 31 avosto si partì el ducha de Milan con li fioli et danari et tre cardinali, misier Galeazo, misier Marchexin col fradelo minore, el conte di Melze, uno signor dil reame, el signor Hermes, misier Marco da Martinengo, el conte Alexandro et misier Lucio Malvezo qual hora è partito, et con cavalli 400 arivò a Carimate loco di misier Scaramuza Visconte, la matina andò a Como sté do zorni lì poi il mercore a Bellano dove alozò quella note, poi l'altro dì a Morbegno, l'altro dì a Sondrio et li vene contra 600 fanti todeschi capitanio uno todescho a chi esso ducha li à donà la forteza de Tyram et de Piantamalo; el sabato poi andò a una villa, et la domenica a Bormio, dove ditto ducha have una lettera dil re Maximian che li manderia zente, et l'altro dì vene a Scuderno, et il ducha alozò in castello dil conte de Mazo, el dì seguente andò a una villa, el zorno drio a Meran. Et a Scuderno ebbe una lettera dil prefato re, li diceva in do mexi lo voleva rimeter in caxa, e darli il mioramento, et l'opinion dil ducha è di far tre campi, uno per Roverè con fanti, et farà presto, uno per Valchamonica, el terzo per Friul con cavalli tutti sul stado di la Signoria nostra, vol venir a meter banco et dar danari a Trento. Et par il re mercore se dia trovar a Bolzan. Item, disse in castel de Milan erano rimasti li infrascriti: misier Bernardin da Corte, misier Jacomo suo fradelo, misier Bergonitio Botta, misier Pareto Corso, misier Filipin dal Fiesco, misier Cristoforo di Calabria et misier Biancon da Basagiepie, et questi sono li capi principali.