Item, mandò il vice armirajo di Modon con lettere a quel rector di Lepanto confortandolo, non era ritornato, dubitava non fusse stà preso da' turchi. Item, li nostri di l'armata erano sublevadi non volendo piò star su le galie per esser passati quasi mexi 6, siché si trova in questi termini. Manda lettere aute da Corom, provederà a custodir li altri lochi, et bisogneria mandar fanti in levante et far provision, facea fortifichar il Zante, et li homeni abitanti zà vendevano li cavalli per partirsi, à fato far proclame che chi andava via perdeseno le lhoro possession, il castello si fortificava, à posto uno contestabele chiamato Moro Biancho con page ..., et par ponesse provedador al Zante sier Nicolò Marzello era sopracomito, et in suo locho messe sier Nadal suo fiol per sopracomito, et questo fè perché sier Nicolò Fero, era lì provedador, havia tanta paura non voleva restar come scriverò al loco suo più avanti, dimanda polvere, monition etc. Et starà lì con l'armada a veder l'exito, etc.
     
      In la lettera di 3. Avisa di 7 barze da Rhodi havia retenute in armada con homeni per una numero 100, a do li darà ducati 3000 al mexe, siché lo resto di l'armata di Franza partì a hore do di zorno biastemati da tutta la nostra armada.
     
      Item, è venuto da lui domino Thodero Paleologo, li à ditto Lepanto è perso, sono stà fati exempli per anni 4 dal Signor. Item, per una naveta di Coresi, partì è 40 zorni di Constantinopoli, à inteso ivi esser stà fato cride tutti dovesseno venir in armada dil Signor etc.