Da Corom, di sier Cabriel Venier; et sier Fantin Zorzi rectori, di 24 avosto, et di sier Francesco Zigogna provedador di la Morea scrita al zeneral. Come havia auto tutto el Brazo de Maina, videlicet caxe 3283, restava solum casali 14 ad haver tutto el Brazo, et à posto in castel di Brazo, sier Hironimo Barbo, fo di sier Nicolò, con 25 fanti, avisa non haver danari, voria subsidio per haver fato fortifichar [1324] el castel del Griso, et Castelfrancho lochi importanti.
     
      Di Candia, di sier Bernardo Zustignan capitano et vice ducha, et consejeri, de 19 avosto. Avisano li successi seguidi, et di biscoti et nave armade mandate in armada. Et mandoe uno reporto ave sier Hironimo Boldù consejer de lì dal canzelier di la Canea, di 9 di l'istante, di alcuni avisi da Constantinopoli, zoè di oratori dil re Fedrico, signor Lodovico ducha di Milan et fiorentini, quali erano stati retenuti dal Signor turcho, et quel dil re è apresso il Signor retenuto. Item, in Constantinopoli, esser restati pochi homeni et mancho navilii, et dice cosse incredibile di la potentia di la lhoro armada.
     
      In questa sera, come fo compito di lezer le lettere, sier Zacharia Dolfin provedador, executor sopra le cosse di mar, qual era rimasto podestà et capitanio a Crema, si levò in piedi dicendo: serenissimo principe, ho più a caro operarmi a li servicii di la Signoria vostra che niuna altra utilità over honor non potesse haver, perché io fo el ben mio et de mei fioli, per tanto refudo la ditta podestaria, et cussì el principe lo laudò summamente, et fo ordinato notasse cussì la sua refudation.