Item, darli una galia grossa per il lhoro andar; e atento si habino oferto pagar le refusure a le zurme nel ritorno damò li sia ubligato li danari di le decime.
     
      Item, fu posto per tutti di dar provision ducati 20 al mexe a Jacomo Coltrin inzegner va a Corphù etc., et fu presa, et cussì andò.
     
      Item, fu posto per li savii, che li oratori deputati andar da la majestà dil re di Franza si partino per tutto doman sub poena, et fu presa.
     
      Item, fu posto per tutti li savii la comission a sier Tomà Zen el cavalier va capitano di le galie grosse; et parse a nui 4 savii ai hordeni, manchava il Barbo, darli più auctorità zoè quando saria a qualche impresa e niun di governadori non farà il dover lo metti in ferri et lo presenti al zeneral qual li debbi punir; et sier Piero Capello cugnado di sier Marchio Trivixan andò suso dicendo si toleva l'autorità al zeneral. Io li andai a risponder, andò le parte, 72 quella di savi, 110 l'adition nostra e fu presa.
     
      Et è da saper, il primo parlasse fu sier Antonio Calbo perché si meteva in la ditta comission facesse venir li patroni tutti di le galie grosse a presentarsi a le prexon excepto sier Vicenzo Polani, sier Lunardo di Prioli et sier Zuam di Garzoni, et voleva etiam fusse cavato sier Polo Calbo, et fè lezer una sua lettera li scrivea copiosa assai, et uno capitolo di una lettera di sier Domenego Malipiero provedador di l'armada, qual dice cussì: quando Dio volse ma tardi la galia Calba et Guora investì a la frota de le galie sotil, et se 'l capitano di Barbaria havesse fato el suo dover che intrigò la galia Polana et Guora, la galia dil bassà certo era presa, fu preso galie 4, fusta una grossa con tutti i homeni, per Dio Polo Calbo e Zusto Guoro merita laude.